阿古路﹕巴神的世界我懂
自傳爆料 「佢真係黐線！」
[2014.10.26] 發表
「為何總是我？」「你唔做咁多傻事，就唔會係你！」
利物浦前鋒巴洛迪利當年在曼城穿上「Why always me?」T恤，以6：1大破曼聯，成為曼市打吡經典；3年過去，仍效力「藍月」的阿根廷射手阿古路推出自傳《Sergio Kun Aguero: Born to Rise - My Story》(圖)，大爆巴神內幕，甚至剖析其瘋狂行為的心理。巴神的世界，難道阿古路真的懂？
「別人笑我太瘋癲，我笑他人看不穿」，當利物浦領隊羅渣士正為巴神苦惱，看來他應向阿古路取經，事關阿古路似乎看穿巴神了！阿Kun剛剛推出自傳，邀得球王好友美斯寫序，不過真正吸引球迷的卻是大爆巴神內幕的篇章。
「大家都知馬里奧(巴神名字)黐黐哋，事實係，佢真係黐黐哋。當佢想發癲時，就有層出不窮嘅瘋狂行為，因為佢認為咁做冇問題。」阿古路嘗試為巴神解說，不過聽起來有點牽強。
至於巴神不為球迷所知的瘋狂行為，阿古路在自傳如數家珍，例如經常在飯堂向隊友掟芝士，訓練時胡亂將皮球向四方八面踢走，當日佢著住「Why always me?」T恤落場鬥曼聯，原來所有隊友皆不知情，「佢經常同我講，『又有警察跟住我嚟訓練基地，佢哋好想同我講嘢』。的而且確，接待處時有廣播警察先生上門搵巴洛迪利，我相信同佢習慣超速駕駛有關」。阿古路更用「父子」形容巴神與前領隊文仙尼的關係：「兩人就好似貓貓狗狗咁，一時大打出手，一時攬頭攬頸，十足十一對父子。」巴神曾經與文帥於訓練時講手，仔打老竇隨時畀雷劈喎！
曼城隊友都掛住巴神
巴神的世界你永遠不會懂，是愛？是恨？文仙尼、羅渣士都有唔同答案，阿古路自言好掛住舊隊友：「我好掛住佢喺我身邊團團轉，每個曼城隊友都永遠懷念佢！雖然佢黐黐哋，但佢喺更衣室好受歡迎，我最鍾意同佢玩。」
更多體育
「意甲步向死亡。」祖雲達斯主席安德列艾里尼不諱言，與競敵皇家馬德里、拜仁慕尼黑等相比，「老婦人」已遠遠落後，若各支意甲球隊還不正視弊端，這個...
詳情
轉戰美職的韋拿與卡卡有望到港賀歲？承辦明年賀歲盃的南華足主張廣勇透露擬邀美職、日職及俄羅斯球隊參賽，斟介中的美職球隊不乏香港球迷熟悉的球星壓...
詳情
相關新聞
