【明報專訊】光頭匪徒斗膽喺鬧市公然擄走「習近平」？原本喺旺角街頭同關帝像「並肩守護」佔領區嘅「國家主席習近平擔遮」惡搞易拉架，噚日凌晨畀一個戴口罩嘅光頭男人同幾個同伴擄走，沿住山東街向洗衣街方向逃去無蹤，至今下落不明。 事發噚日凌晨3點幾，據當時坐喺關帝像旁邊嘅袁小姐話，佢首先聽到「砰」一聲，擰轉頭一望，見到有個戴口罩嘅光頭漢連同幾個同伴收起易拉架，之後夾住「習總」沿山東街向洗衣街方向逃去，好多集會者聽到消息即刻起身追捕匪徒但不果。警察後來接報喺附近兜截，一樣無發現。 其餘綁欄杆邊 變影相位 發生「習總」綁架事件，旺角集會者即刻用膠索帶將企喺惠豐中心出面嘅另一幅「習總」易拉架綁喺欄杆邊。餘下嘅「習總」魅力愈來愈大，有內地遊客仲揸住把遮埋去合照，某些時段合照甚至要排隊?！ 呢幅易拉架構圖係國家主席習近平之前喺武漢擔遮考察嘅「得獎照片」，被集會者惡搞整成易拉架，仲寫上「一起舉傘，一起的撐！」口號，變相借「習總」幫集會者打氣。除咗旺角，金鐘同銅鑼灣都可見到「擔遮習總」嘅身影。 警方就話，正就易拉架被盜一事聯絡物主研究係咪要追究。但話時話，「習總」現身以來，一直無人承認易拉架嘅主人，警方可以聯絡邊個？
|
| |
| |
;){kind=small}
;)
