【明報專訊】財政司長曾俊華早前提出拎5億元出嚟搞起香港時裝業，政府噚日就宣布成立一個「時裝業諮詢小組」，搵咗一班業界人士加入做成員，包括著名時裝設計師譚燕玉(Vivienne Tam)、立法會紡織界議員鍾國斌、時裝品牌老闆陳欽杰等，主席就由對設計有研究、出身工業界嘅羅仲榮擔任。 Vivienne Tam任成員 鍾國斌就話佢之前已向政府提交發展建議，包括政府資助建設「樣板房」幫年輕設計師造衫及小量生產，喺香港推廣時裝設計行業，鼓勵年輕人入行，以及資助有潛質設計師出外參展，等佢哋可以打出名堂。佢話時裝設計屬創意產業，諮詢小組如諗到好嘅計仔推動時裝發展，其他創意產業都可以參考呢套推動模式。 諮詢小組有18名非官方成員，睇番個名單，有時裝、設計、成衣和紡織業界嘅代表同學者。成員包括有羅氏針織後人羅可欣，佢早前創辦非牟利機構Fashion Farm Foundation推廣本地設計。另一成員陳偉豪就建立咗以聖經為主題嘅時裝品牌AMENPAPA。 部分業界成員更與政界有關係，好似陳淑玲，係政協常委陳永棋堂妹；方淑君係政協方鏗嘅長女；梁嘉彥就係立法會議員梁君彥嘅細佬。
|
| |
| |
;)
