【明報專訊】政務司長張建宗喺網上呼籲市民調整今年清明節去拜山嘅時間，希望大家避開清明節當日人多擠迫嘅高峰期，喺清明前後前往拜祭，藉此分散人流，減低病毒傳播風險。司長亦呼籲大家改用食環署嘅「無盡思念」網上追思服務，或者下載「無盡思念」手機應用程式，可以隨時隨地追思逝去嘅摯親。 張建宗喺網誌話，如果前往拜祭先人，市民要保持適當嘅社交距離，要戴口罩。佢又話，以往有唔少人掃墓後會一齊分享食用乳豬、燒肉同雞等，但由於疫情持續，大家掃墓時應避免聚餐，減低傳播風險。 去年清明正日7.8萬人去和合石 張建宗又提供數字，話去年清明正日，有7.8萬人去和合石拜山，鑽石山都有6.4萬人，荃灣同將軍澳墳場分別有6.5萬同6.2萬人，山上人頭湧湧。 張建宗提醒，所有由內地抵港嘅人要強制檢疫14日，包括返內地拜山嘅市民，違反者最高可被判入獄6個月同罰款2.5萬元。
|
| |
| |
;)
