【明報專訊】佔領中環一觸即發，呢幾日無論政府、警方定傳媒都好想知道佔中幾時發生，大家四出打探。政府本來評估佔中應該趕唔切喺中秋節搞，應該會喺十．一國慶發生，所以原本中秋假期需要standby嘅警務人員都可以放番假。但最新發展係，民陣一個「小動作」又搞到佢哋可能月餅都唔得閒食。 話周日銅鑼灣去中環 Emily聽聞，民陣噚日入咗紙申請不反對通知書，話星期日會有1萬人喺銅鑼灣遊行至中環，呢個消息喺警隊內部好快傳開，搞到一班警察好頭痕。點解？因為關乎佢哋中秋有無假放。 佔中搞手近日多會開 噚日部分參與處理佔中行動嘅警員陸續收到通知，話中秋都係無假放，要為隨時佔中戒備，主要係駐守各警署嘅第二同第三梯隊警員受影響，因為第一梯隊嘅機動部隊(PTU)同衝鋒隊(EU)都「預咗隨時出動」。有警務人員呻無假放「好慘」，又覺得咁樣搞法好消耗人力物力，而且警方都要兼顧中秋賞月嘅人流管制工作。 究竟係唔係星期日佔中？佔中一班搞手呢幾日都有好多決策會議要開，成個氣氛都好緊張。Emily聽聞民陣都係響應政府「袋住先」嘅呼籲，「入住先」申請遊行，實際點搞未有定案。民陣就話呢個月一切都有好多變數，隨時準備有社會抗爭，周日有咩行動，一切以佢哋公布為準。究竟星期日係咪佔中？佔中秘書處叫Emily問番民陣喎。 雖然Emily都捉摸唔到民陣想點，但可以肯定嘅係，政府對於民間團體每個動作都好緊張好敏感。
|
| |
| |
