【明報專訊】特首梁振英(CY)喺剛過去嘅周六、周日，都喺禮賓府搞閉門活動，邀請地區及唔同建制團體代表出席，民主派當然無份去，除咗聯誼外，CY亦趁機向在場人士講吓佢關心嘅事。唔知CY係咪見到噚日報章報道佢周六聚會中嘅內容「太詳盡」，令佢唔方便暢所欲言，所以噚日佢就多次提醒大家唔好錄影喇。 雖然CY見建制派係閉門活動，但唔少人喺活動期間或完咗後，都不忘「打卡」、將同出席者嘅合照等放上社交網站，可能CY懷疑有人錄音、錄影，令傳媒好清楚佢講咩啦，有與會者透露，噚日第二場聚會中，CY一開頭講嘅，係溫馨提示大家，話知道有傳媒搵與會者錄影，但希望大家唔好咁做喎。 「齊心」網上未見獨家片 不過，呢個呼籲最搞笑嘅係，斷正嘅反而係CY嘅自己友！有出席者話，CY發言途中，已做手勢叫停政府新聞處嘅職員唔好影相，點知仍有人唔生性攝錄，去到發言後期，CY突然指住台邊一人，問佢係咪錄影緊，又問對方係邊位，對方自稱「齊心(基金)」，原來係自己友，但CY亦叫唔好影喇。 齊心基金負責嘅網上平台「港人講地」，噚日未見有乜嘢「獨家」報道呢次禮賓府活動，只係引述傳媒嘅即時新聞，唔知係咪因為CY唔想影片出街呢？
|
| |
| |
