【明報專訊】民主黨主席劉慧卿(卿姐)上月初率團訪問日本，帶埋副主席羅健熙在內嘅6隻「乳鴿」隨行，卿姐噚日就同部分團員匯報行程。「跟住卿姐去旅行」機會難得，不過有隨團乳鴿噚日就喺卿姐面前講，同卿姐出trip壓力好大，究竟所謂何事呢？ 原來喺行程其中一日，約定朝早7點半喺酒店大堂集合，但乳鴿鄒旻芳(Ashley)遲遲未出現，於是卿姐直接踩上去拍佢房門，發現Ashley原來仲未起身，結果成團人遲咗半粒鐘先出發。Ashley話當日畀卿姐拍門「壓力好大」，所以之後學精咗，第二朝晨早起身，仲早到過其他團員𠻹。 其實民主黨今次行程非常豐富，除咗參觀當地商業同學術機構，亦同當地官員議員交流。卿姐話，佢哋到訪日本外交部，對方嘅官員表達對銅鑼灣書店事件嘅關注，卿姐無引述官員談話內容，但佢話相信無論日本定其他國家，都會關注自己國民喺香港嘅人身安全。 早前有訪京律師團被揭「夜蒲」醜聞，羅健熙就笑住話民主黨訪日團雖然都有喺夜晚玩，但只係去食飯，無去「KTV」，十分正經，卿姐亦話團員「軍紀好強」。
|
| |
| |
;){kind=small}
