【明報專訊】近排廉署查案一姐被取消署任風波，成為尋日特首答問大會焦點，有份提問嘅泛民議員大多數都有追問，特首梁振英就答得相當謹慎。工黨張超雄追問UGL事件時，一時唔小心將澳洲企業UGL講錯咗做「UGC」(大學教育資助委員會)，雖然佢下一句已即時更正講番，但梁振英即時笑住口講咗句，「張超雄議員連間公司名都講錯，說明張超雄議員對呢件事嘅認識」，議事廳即刻傳嚟一陣起哄聲。 梁振英又話，張超雄嘅問題好多以前已經答咗，公民黨嘅郭家麒聽完嬲得滯企起身走出座位，話要向梁振英送「破壞廉署」道具牌，最後當然畀主席曾鈺成趕離場。郭家麒事後話，今次係佢做議員8年黎第一次被逐離場，問佢點解咁激，佢話覺得梁振英喺會上嬉皮笑臉，又唔回應問題，聽到佢好憤怒，要表達不滿： 「佢有無收UGL 5000萬？有無報稅？有無向行會申報？全部無答，不斷講大話。」
|
| |
| |
