新舊議員聽曾主席分享 新丁上早堂 食蕉又唧面

[2016.10.05] 發表

【明報專訊】剛卸任立法會主席嘅曾鈺成噚日重返議會，同一眾議員分享議會經驗。歷時兩個鐘嘅分享會喺朝早9點半開始，26名新丁議員中至少有13人出席，民建聯周浩鼎一早到達，可能食唔切早餐，佢喺議事廳食蕉同三文治充飢；而工聯會陸頌雄就不時用雙手搲面，唔知係唧緊暗瘡定搣鬚根呢，但都有唔少議員專心抄筆記。

浩鼎朝朝一三文治一隻蕉

立法會秘書處話，噚日個分享會有28個議員報名，最後有25人出席，又話雖然立法會無提供茶點，但無限制議員攜帶小吃享用。周浩鼎解釋，自己習慣每朝食一件三文治、一條香蕉做早餐，加上噚日朝早9點已經到咗會議室等候，所以聽書前直接開餐。

噚日出席嘅議員新舊參半，除咗阿鼎同陸頌雄，仲有民主黨許智峯、熱血公民鄭松泰、功能組別嘅姚松炎同邵家臻等人。曾鈺成頭一個鐘先講解議事程序，可能題目太嚴肅，唔少議員都面露疲態，去到問答環節先精神番。

作為新丁嘅邵家臻問及「官員驚(立法會)乜」，曾鈺成秒答「驚要嚟立法會，嚟少一次就開心啲」，但就話其實唔少官員都好盡責。

金融界議員陳振英就問，議會嘅衣著同道具有咩限制。曾主席話自己比較鬆手，通常唔妨礙其他議員就可以，又提到衣著規定要與時並進，例如𠵱家准議員著「革命英雄」T恤嚟開會，說罷長毛梁國雄剛好入場，引來全場大笑。曾鈺成最後以「祝各位好運，都祝我哋下一屆主席好運」一句結束分享會，之後仲有唔少議員搵佢合照。

更多港聞