當年規劃佳 彩虹邨「最好行」 好行評分 觀塘包尾

當年規劃佳彩虹邨「最好行」好行評分觀塘包尾

[2016.12.15] 發表

【明報專訊】思匯﹕新發展區應借鑑

香港地人多車多，要搵個地方舒舒服服行吓的確唔易。民間智庫「思匯政策研究所」噚日公布一項有趣嘅調查報告，根據步行嘅趣味、舒適度、效率同埋可步行性4項因素，制定咗一套為香港度身訂做嘅量度工具「好行評分」，結果顯示，1960年代落成嘅彩虹邨係今次調查中「最好行」嘅地方，幾乎滿分；反觀政府銳意發展作為商貿區嘅觀塘就排包尾，成為「最唔好行」嘅地區。

思匯今次以「好行評分」評估香港4個地區，以滿分42分計算，彩虹邨一共有41分，成為「非常好行」嘅區域。思匯解釋，雖然彩虹邨樓齡高，但作為最早建成公共屋邨之一，當時嘅規劃同設計都良好，認為未來新發展區應該要借鑑彩虹邨嘅規劃元素。

中環評分中等旺角令人不適

本港核心金融商業區嘅中環只有23分，好行程度被評為「中等」。思匯話雖然中環有行人天橋系統，交通高效便捷，但區內欠缺公共設施，加上街道景觀唔理想，有待改進。至於人多車多嘅旺角只有18分，其中區內例如彌敦道人流繁多，令人感到不適；觀塘更加只有11分排包尾，思匯解釋，觀塘目前已經唔能夠滿足市民嘅步行需要同步行舒適嘅要求，但認為隨住觀塘正轉變為商貿區，可以藉機會改善步行環境。

思匯又話，其實「好行」最重要本質係「行人優先」，目前全球亦都不斷推廣呢個理念，仲話提高「好行度」可以令香港成為世界級宜居城市，因此希望透過倡議「好行」，令政府同商界規劃社區時都採取「行人優先」原則。

更多港聞