行書展買一帶一路書 聶德權邱騰華識做

行書展買一帶一路書聶德權邱騰華識做

[2017.07.22] 發表

【明報專訊】一年一度書展噚日踏入第三日，繼特首林鄭月娥後，商經局長邱騰華同政制及內地事務局長聶德權噚日亦先後參觀書展，獲青協安排同年輕人對話，又喺攤位買有關一帶一路國策嘅書，緊跟國家主旋律。聶德權鍾意睇書同跑步，佢噚日向年輕人推介兩本運動心得書籍時，講笑話今年成功試跑渣打半馬，最大動力係擔心跑得慢會畀傳媒報道咁話。

加入問責班子前擔任食衛局常秘嘅聶德權，噚日喺分享會上被問到做局長壓力有無增加，佢話其實「差唔多」，雖然工作忙碌咗，有好多新嘢要學習，但心境保持良好，「仍然好瞓得」。

聶德權提到自己好鍾意松本清張嘅《點與線》，話有次老婆喺出門口前，叫睇緊書嘅佢幫手喺屋企做嘢，結果老婆去完成日街返嚟，自己一樣嘢都無做到，因為本書「揸喺手停唔到(睇)」。

邱騰華喺另一場分享會透露，自己每次剪完髮都會行書店，因為佢幫襯嗰間髮型屋附近有書店，每兩三個星期就會行一次。佢話，自己特別鍾情市區樓上書店，因為有種文青、「大隱隱於市」嘅感覺。