【明報專訊】保險界立法會議員、財委會主席陳健波(波哥)批評過官員嘅答問題技巧，佢噚日趁特首林鄭月娥出席立法會特首答問會，當面投訴有官員喺財委會會議答問題時未能聚焦議員條問題度，答非所問，淨係講啲「line to take(標準答案)」，令人覺得官員唔掌握撥款項目情况。佢話，官員咁樣答問題，自己都好難阻止議員追問，擔心要喺立法會暑假休會前審議完剩番嘅撥款申請有難度，問林太會點樣提升官員回答水平同質素。語畢會議廳內即傳出掌聲。 林太就話，政府同各黨派傾完之後，立法會審議進度有明顯改善，但如果進度可更快，政府都想交一啲唔太迫切但又想做嘅項目上嚟。 林太批評有議員提問離題 佢之後承認，官員答問題嘅水平永遠有改善空間，而佢𠵱家企喺度回應議員提問，都答得比半年前好，所以有經驗的話應該可以答得好啲，又相信各司局長會更多向同事分享，更直接、大膽、到位回應議員問題。不過，林太同時批評有議員嘅問題離題萬丈。 波哥聽完再問特首，贊唔贊成佢邀請官員一齊「盡訴心中情」，林太就話佢早年做過財經事務及庫務局副秘書長，長期要坐喺財委會入面，甚至「開班」教其他局嘅官員點答問題，「如果陳議員願親自操刀，以財委會主席身分與官員分享，非常感謝，我們馬上安排」。
|
| |
| |
