【明報專訊】民主黨立法會議員許智峯聲稱因為不滿政府人員喺立法會監視議員行蹤，因而奪去政府人員手機；搶手機事件引起外界關注政府「狗仔隊」嘅問題，本土研究社成員黃肇鴻(圖)曾經係「狗仔隊」一員，佢話做「狗仔隊」係「好無聊，超級無聊」，唔單止「全日無咗，做唔到本身要做嘅工作」，有時遇上議員拉布，可能連水都無得飲。 黃肇鴻噚日喺商台節目《在晴朗的一天出發》談及昔日喺政府嘅工作點滴，佢話「狗仔隊」成個制度有啲奇怪，「本身議案如果係好、值得支持，議員盡責都會喺度，但𠵱家兩樣都唔係，𠵱家議案本身就唔受歡迎，仲要用呢啲方法睇實議員叫議員投票，議員感受係點呢？」 黃肇鴻亦自言認人有困難，未必認到功能組別嘅議員，都係要靠張(點相)紙。佢又提到議員都有尊嚴，但監察一啲議員嘅行蹤，「你(議員)仲有啲咩尊嚴呢？」
|
| |
| |
;){kind=small}
