【明報專訊】Emily有時候聽政府講政策方向，如「錢跟人走」就聽得多，近來先聽聞原來有「熱水爐跟人走」嘅做法。 話說唔少紀律部隊人員同Emily呻，話佢哋員佐級人員入住政府宿舍，舊制即2000年6月前入職，其福利條款包括若獲發宿舍，會配備熱水爐設施；但於2000年6月後入職人員，入住嘅宿舍就無熱水爐。結果就出現一個好荒誕嘅情况，即係舊制人員搬離宿舍，而新制人員搬入，產業署就要叫煤氣公司拆走個熱水爐，如其後舊制人員搬入，又要去裝番個熱水爐，故不少紀律人員宿舍嘅熱水爐成日又裝又拆，好浪費資源。 紀律部隊人員總工會近年收到唔少人員投訴呢個做法，近期終於約到產業署開會，建議取消呢個「熱水爐跟人走」嘅政策，畀所有人員嘅宿舍都配備熱水爐。聽聞署方都初步明白訴求，應該稍後就會作修正安排，詳情有待落實。
|
| |
| |
