特首林鄭月娥平日係女強人，但提起老公林兆波時都有小女人嘅一面。話說林太噚日出席恆隆數學獎嘅頒獎禮，致辭時自然會提起本身係數學家嘅林兆波。林太引述有人話，數學家同政治人物嘅分別在於，前者會用最少嘅字講最多嘢，後者就啱啱相反，「所以你們可以想像，當政治人物與數學家結婚，化學作用會是怎樣」。佢又話自己好尊重每位數學家，喺老公面前都唔敢講太多嘢，似乎想隔空冧吓坐喺台下嘅林兆波。 查實林太兩年前喺同一場合都講過類似說話，當時佢話老公同兩個仔都係數學系畢業，每次喺餐枱上講嘢佢都聽唔明咁話。 返埋今日終於放假 返埋今日工，過去甚少放假嘅林太，聽日至28號都會離開香港放聖誕假，其間由政務司長張建宗署理特首職務。睇番資料，林太舊年都係聖誕放假，當時佢哋全家去桂林旅行，唔知今年又會去邊呢？
|
| |
| |
