「泛民有人教唆台灣反移交」 阿涂發火：周浩鼎你講邊個！？
[2019.04.01] 發表
【明報專訊】特區政府修訂《逃犯條例》，話要將台灣殺人案嘅疑犯移交台灣受審，並修補制度漏洞，將中國內地同埋台灣都納入可個案式移交逃犯嘅地方，但台灣陸委會就表明唔接受咁樣修例。一直協助殺人案受害者家屬嘅民建聯周浩鼎(Holden)噚日喺《城市論壇》上不點名話，「香港本地泛民主派人士走去台灣，教唆人哋叫人反對今次移交安排，我好失望，對家屬好唔公道」；同場嘅民主黨涂謹申即時問：「你講邊個呀？你講出嚟啦」，話周浩鼎嘅指控好嚴重，現場火藥味好重。
周：去過台灣嗰啲咪係囉
開火源於主持人蘇敬恆問Holden，如果台灣唔接受修例方案，結果唔要求香港移交疑犯咁點算，Holden就將矛頭指向民主派。阿涂追問邊個教唆台灣反對後，Holden話「去過(台灣)嗰啲咪係囉」。
涂：我叫港府快啲同台灣傾呀
阿涂隨即話自己都有去過台灣，「你話我教唆，我幾時教唆過，你同台灣討論，話教唆係好嚴重指控」。阿涂語帶激動咁話，「我幾時有叫人反對，我叫香港政府快啲同台灣去傾呀！周浩鼎！」
更多港聞
【明報專訊】原定喺維港瞓到噚日嘅KAWS招牌公仔COMPANION，因為天氣不似預期，提早結束10日活動，上周五就無得瞓喇。勞福局長羅致光喺...
詳情
【明報專訊】購物團問題困擾香港，原來連旅遊發展局總幹事劉鎮漢（Anthony）嘅家人都中招。話說Anthony媽媽近日由加拿大返港，原本機票...
詳情
相關新聞
