【明報專訊】特首林鄭月娥去年《施政報告》公布「明日大嶼」計劃，立法會財委會主席陳健波(波哥)其後喺電台節目將反對項目嘅議員形容為「千古罪人」，又話10多個小時就可以通過撥款；公民黨郭家麒向佢提出「不信任動議」，噚日喺特別財會上討論。雖然唔同陣營嘅議員針鋒相對，但會議上都充滿議員之間嘅愛。 話說公民黨譚文豪(Jeremy)發言時提到，佢未做議員時，波哥曾喺主席台上叫建制派記住支持項目，認為咁並唔恰當；謝偉俊(Paul)其後就話譚文豪講舊事唔公道，仲突然話Jeremy無論講任何題目都會提起佢；Jeremy隨即反駁叫Paul唔好對號入座咁自戀，Paul就話「譚文豪話我自戀，佢好(迷)戀我，每次都拎住我嚟講」，Jeremy似乎相當無奈，唯有叫阿Paul喺議會莊重啲。 何啟明向波哥送心心 工聯會何啟明噚日發言撐波哥時，就做出韓式「心心」手勢，「真係要畀個心心你呀」，佢澄清唔係對波哥有「特別嘅愛」，只係認為波哥會上講道理，仲不點名話泛民唔講道理、「秀才最怕潑婦」，但可能近日較多與女性相關嘅爭議言論，何啟明都特意講「潑婦」係指野蠻嘅人，唔係指女性。
|
| |
| |
;){kind=small}
