【明報專訊】香港觀鳥會公布今年全港麻雀普查，數量回升至30萬隻，比舊年25萬隻多咗約兩成，回復到2016及2017年嘅水平。調查留意到，麻雀適應能力好高，香港嘅麻雀有約94%都係將巢築喺建築物外，觀鳥會嘅研究人員都知道雀鳥嘅糞便會造成滋擾，建議大家裝臨時托盤，包容一下雀仔。 香港觀鳥會高級研究專員彭俊超話，「慶幸」今年麻雀嘅數量升番，估計舊年係因為天氣乾旱令麻雀延遲咗繁殖期，致數量下跌，今年5月雨量升，麻雀適應到天氣變化，就回復番之前嘅水平。 觀鳥會又發現，約94%嘅麻雀係喺建築物上築巢，於深水埗、屯門、大埔等舊區最常見，彭俊超話因為舊樓外牆有凹凸位，麻雀可於樓宇度築巢，避過家貓、鷹等天敵；仲話日本有研究，大廈轉用玻璃幕牆興建，有可能令麻雀無位置繁殖或居住，希望建築時注意設計對人好嘅同時，係咪對動物好。 若覺得鳥糞造成滋擾，彭俊超建議裝臨時托盤，仲提醒拆走繁殖中雀鳥嘅鳥巢係犯法㗎。至於雀仔繁殖完走咗可唔可以拆走，彭俊超亦建議唔好，因為留意到啲雀巢係會重用嘅。
|
| |
| |
;){kind=small}
