【Emily】政助馮興禮一索得男 cool爺爺馮載祥好興奮

[2019.10.31] 發表

【明報專訊】立法會上年通過將男士侍產假由3日增加到5日，勞工及福利局政治助理馮興禮(Henry)可以受惠於呢個「成功爭取」喇！佢同Emily透露將做爸爸，太太一索得男，11月30日開刀生BB。

Henry話早前諗住好感人咁同老婆講「從此屋企多咗個人」，點知老婆答佢「係囉，多咗你」，笑言囝囝出世後自己會無碇企。Henry話會返工返到29日先放假，因為想多啲時間照顧妻兒。

準備好迎接新生命未？Henry話呢一個月嘅準備工夫就係「瞓多啲」，因為預計湊仔會無覺好瞓，仲有上YouTube睇片學湊仔。有新家庭成員加入，Henry話有好多家人支援，已經分埋工，佢家姐會負責教育，爸爸、立法會前秘書長馮載祥負責運輸，以往係職業女性嘅媽媽就會「共同體咁存在」，外母會幫手湊孫。佢話已經請咗位煮嘢食好叻嘅陪月，相信到時佢自己都會增埋磅。

會繼續爭取增加侍產假

Henry話，平時睇落好cool嘅爸爸，對於孫仔即將出世好興奮，佢希望囝囝似老竇咁靚仔，似老婆就靚上加靚。會唔會追多個？Henry話會繼續爭取增加侍產假，笑言下個BB出世時就可以享用喇。