【明報專訊】《亞洲週刊》評選「香港警察」做「2019年度風雲人物」，作家董啟章噚日喺facebook專頁發文，話《亞洲週刊》內文誇讚警隊，無視警隊纍纍暴行，「可見《亞洲週刊》已經刊格全無，淪為宣傳機器」，董啟章仲拒絕自己嘅作品《命子》入選同期嘅「亞洲週刊2019十大小說」。《亞洲週刊》總編輯邱立本回應話「文學歸文學，政治歸政治」，風雲人物唔係睇「顏色」，而係對歷史進程嘅影響。 拒作品入選「亞洲週刊十大小說」 《亞洲週刊》嘅專題提到，「香港警察是2019年最被扭曲、被辱罵的群體、也是最被仰賴、最被敬重的群體」。董啟章批評文章內容「無視警隊纍纍暴行，毫無半點探討之意，形同黨媒宣傳文稿，立場之偏頗，言論之膚淺，令人噁心」。民運人士王丹就喺fb專頁呼籲香港同台灣民眾抵制《亞洲週刊》。 總編：文學歸文學，政治歸政治 Emily問返邱立本，佢強調「文學歸文學，政治歸政治」，話每個人都有唔同睇法，風雲人物唔係睇「顏色」，而係因為影響到歷史進程，即使《時代雜誌》每年「年度人物」都有人讚有人彈。至於畀董啟章話「刊格全無」，佢就話唔需要介懷。
|
| |
| |
