【Emily】區議員預告掃賭檔 話有棍棒刀鋸
[2020.03.23] 發表
【明報專訊】唔少屋邨都有聚賭問題，街工元朗區議員何惠彬前日喺facebook呻，話有街坊聚集玩啤牌、賭錢，仲嘈到人，但當中唔少都係投票畀佢嘅選民。佢喺fb發出「掃場行動」通告，話今日要向街坊訓話，帖文有句「用具：未諗好帶乜，棍棒刀鋸我都有」，並post咗一把刀嘅相。
民記區選敗將譴責倡議武鬥
何惠彬區選對手、民建聯司徒駿軒話對事件震驚，譴責何「倡議武鬥」，以刀鋸等足以致命嘅武器對付居民，促請民政事務局同警務處調查。
「我話我有，冇話會用呀」
Emily搵何惠彬了解過，佢第一句就話「(棍棒刀鋸)我話我有，冇話會用呀」，強調聚賭嗰班都係街坊、一向都有偈傾，但聚賭引起嘅噪音、衛生問題影響到附近街坊，管理處同警方一直冇處理。佢話到時態度會強硬好多，如果街坊拒絕讓步，佢都要「做嘢」、搵膠帶封場。咁點解影住把刀？佢解釋話係指投訴同賭錢嘅街坊「手背係肉，手心又係肉」、「拮唔落手」。
更多港聞
【明報專訊】疫情下，市民用唔同方法增強免疫力，香港中醫藥服務中心推出「草藥防疫香包」，內有蒼朮、白芷、檀香、甘松、艾葉、冰片等，仲加入薰衣草...
詳情
【明報專訊】行會成員、新民黨主席葉劉淑儀上周因私事急赴珠海，返港後要接受強制檢疫。雖然留喺屋企，但葉太生活一樣多姿多采。佢透露有祖籍湖南嘅朋...
詳情
相關新聞
