【Emily】屯馬線模擬「尿袋」冒煙 演習疏散
[2021.03.15] 發表
【明報專訊】港鐵屯馬線今年稍後時間投入服務，港鐵噚日凌晨做救援演習，模擬列車行駛期間發生事故，以測試緊急應變部署同程序，港鐵、消防處、警務處均有派員參與，機電工程署、運輸署同路政署就派代表視察。
演習模擬一列列車由尖東站開往紅磡站屯馬線新月台時，一名乘客手機充電器突然冒煙，濃煙迅速蔓延，同一時間列車失去動力，喺隧道停低，車上乘客由列車緊急出口離開車廂，喺車站職員帶領下，沿隧道步行至鄰近嘅紅磡站。部分「受傷乘客」被帶往安全位置治理，一人被送往醫院，演習最後順利完成。
全長56公里嘅屯馬線，車站多達27個，連接後係全港最長嘅鐵路線，港鐵話屯馬線全線會喺今年稍後時間投入服務，其間會模擬唔同性質同規模事故，做140次演習同測試。
更多港聞
【明報專訊】建制派除咗叫人簽名支持人大修改選舉制度，近日亦發布唔少民調話好多市民支持改制。新民黨立法會議員容海恩噚日舉行記者會，公布「民眾聯...
詳情
相關新聞
