【Emily】連登遭蘋果下架 網民估估吓 管理團隊：疑有會員留言違政策
[2022.03.23] 發表
【明報專訊】網上平台LIHKG連登嘅應用程式，近日畀用戶發現無法喺蘋果公司應用程式商店(App Store)下載，亦都搜尋唔到呢個App，下架惹起用戶猜想。Emily噚日嘗試喺連登官方網站嘅連結前往App Store亦無法下載，反而喺Google Play就可以照常下載。
籲用戶咪亂信亂傳流言
連登管理團隊喺討論區澄清，唔係佢哋將程式下架，初步懷疑有會員嘅留言違反App Store嘅政策而被下架，又話目前同蘋果公司溝通中，呼籲用戶唔好亂信同亂傳流言。Emily向警方查詢有冇要求App Store將有關應用程式下架，警方話唔評論個別媒體報道。蘋果公司喺截稿前未有回覆。
LIHKG連登喺2016年11月開始運作，睇番資料，當年較熱門嘅討論區係高登，其時坊間有唔少第三方瀏覽程式產生，但高登討論區擔心影響官方頁面瀏覽量，停止授權畀第三方瀏覽程式，有網民就另起爐灶成立連登討論區。連登喺反修例事件中，係其中一個本地熱門討論平台。
應用程式開發商李勁華形容，App Store將應用程式下架唔係罕見，當蘋果嘅政策經常改變，而應用程式未能即時更新軟件，蘋果有可能收到投訴，或者喺內部自我監察嘅時候，將唔符合公司政策嘅應用程式下架。佢舉例遊戲開發商Epic Games曾經繞過蘋果公司嘅支付系統，改用其他方式收費，蘋果基於開發商無遵守公司政策，一度將相關遊戲應用程式下架。
更多港聞
【Emily】軒公七師傅錄港鐵廣播 為乘客打氣
【明報專訊】疫情消息同抗疫措施一樣千變萬化，工作疲勞加埋抗疫疲勞，都令人情緒頗為負面。港鐵請嚟歌手張敬軒、「七師傅」七仙羽、前主播方健儀同鄭... 詳情
【Emily】梁君彥「父子檔」落區 籲學童復課前打針
【明報專訊】立法會主席梁君彥同囝囝、經民聯青委會主席梁宏正「父子檔」出動，到深水埗出席接種新冠疫苗活動。梁君彥呼籲學童趁4月19日恢復面授課... 詳情
相關新聞
