梁美芬話通識科「無王管」
批「黃色哲學」老師
[2015.03.27] 發表
【明報專訊】經民聯議員梁美芬(圖)噚日喺立法會提出「全面檢討通識教育科」嘅無約束力議案，認為要檢討課程設計、教學範圍、考核方式，以及師資培訓等各方面。梁美芬喺開場白話，好多家長都擔心所謂通識科培養嘅批判思維，令到小朋友對政府有好多負面情緒，「(小朋友)覺得所有人都欠咗佢……連自己生得唔靚追唔到女仔都係政府、制度嘅錯」，仲話有咁多學生參與佔中，「如果話同通識科無關，就一定唔係」，又話好似一個無王管嘅科目。
指「批判」思維使小孩對政府負面
梁美芬話自2009年通識科實施後，至今收到超過1000名家長投訴，老師同學生嘅求助亦未曾中斷，話曾經收到家長求助，指個女喺學校通識堂學咗繼承法後，叫父母快啲去死，可以分財產。
佢又話通識科「無為而治、漫山放羊」嘅教學方式，令部分有強烈「黃色哲學」嘅老師，用自己通識科嘅平台宣傳喜歡嘅政治理念，又擔心學生無充足資料明辨是非，會被洗腦。
民主黨黃碧雲就反駁話，梁美芬嘅議案多餘，因為當局正檢討新高中課程，質疑梁美芬美其名關心通識科發展，其實係以政治角度針對通識科。教育局長吳克儉回應時就話，通識教育科中期檢討嘅方案和長遠發展方向，預計於7月公布。
更多港聞
【明報專訊】「包山嘉年華2015」嘅壓軸項目長洲搶包山比賽，將於下周四截止報名，而為增添活動氣氛，大會今年起特別喺搶包山比賽增設「擂台獎」，...
詳情
相關新聞
