司局長借題發揮 鍵盤撐政改

司局長借題發揮鍵盤撐政改

[2015.05.11] 發表

【明報專訊】政改得唔得，社會鬧哄哄，司局長噚日都交功課，多人化身鍵盤戰士，喺網誌、facebook等地盤借題發揮，講自己工作範疇之餘講埋政改。好似財經事務及庫務局長陳家強，就以〈不要讓機會溜走〉撰寫網誌，佢話香港利用一國兩制優勢拓展金融業務，「為什麼政制發展不是同一道理？」陳家強仲打比喻，話一人一票選舉「可以說是讓行政長官選舉更加市場化」，話民主有競爭就會演變喎。

陳家強：一人一票更市場化

財爺曾俊華就以〈雞蛋高牆〉為題，話如果一方被指係「真」，另一面嘅就無論如何都變成「假」，咁呢種「二元對立」情况，無可避免會將理性討論問題嘅空間收窄，要尋求共識自然更困難。

財爺無直接話政改，但說法都幾明顯，佢話自己中過頭獎，被人用雞蛋掟中，仲提到日本作家村上春樹以「雞蛋與高牆」作比喻，財爺認為村上所指嘅高牆與雞蛋，應該係形容以色列同巴勒斯坦，但當比喻放在香港，就普遍被人用以形容政府和普羅大眾。

不過財爺對呢種詮釋有異議，話咁其實就等同將政府同人民放喺對立面之上，當一個是「忠」，另一個就自然是「奸」，但現實上雞蛋與高牆其實都可以有好多不同嘅關係，何况現實世界中嘅政府同市民？

去過街頭宣傳政改嘅發展局長陳茂波，就由增加土地供應爭論講到政改，話增地建屋同埋政改，社會上都有人支持及反對。「我們可否先在目前的現實中踏前一步，哪怕這一步未必完美，但同時仍可繼續為理想謀劃出路？」

更多港聞