「小生打人」真到唔似假？

[2015.08.14] 發表

【明報專訊】對於記者來說，有大新聞雖然採訪過程辛苦，但就真的好有滿足感，就如前日採訪《4個小生去旅行》的記者向大姐大講﹕「當時真係好驚呀，不過好精彩。」當日各報記者要與時間競賽，搶先在網上報道即時新聞，該片段更令大家睇完又睇，笑完又笑，之後重要搵「破綻位」考大家智慧，究竟是真？還是假？大家討論得樂此不疲。

大姐大由昨日開始不停收到電話，大家打來都問一句﹕「大姐大，係咪老戲骨演戲呀？好精彩呀！」大姐大笑指大家反應認真奇怪，何解無人可憐或慰問曾江有無被打親，亦無人去評四哥做得對或錯，大家都當一場娛樂性豐富的真人騷來看？

四哥早有計劃

有網民形容4小生是「神耆4俠」，亦有惡搞他們的對白，大家睇完都笑到收唔到聲。大姐大先不定論「4個小生要打人」是真是假，只知謝賢(四哥)早有計劃，在記者會後，待無綫高層離去，只餘下4人一起訪問時才一次大爆發，因為不想有無綫高層來做和事老，令情况陷於尷尬局面，四哥只想一次過把心中不滿爆發就走人。

點解要演大龍鳳

其實要一向注重形象的四哥，在攝影機面前連串爆粗，仲要畀幫記者們攞住收音咪做「盡忠職守」收音師的Joe Junior全程收晒粗口，四哥還一路講一路嬲到口都震，這種氣忿的表情，不是話入戲就即演到，更不會是無綫的酬勞或人情，可令四哥來幫手演幕大龍鳳。

曾江真情流露

而曾江被摑從愕然到有點怯，但又要頂住條氣都駁兩句嘴，這種反應如果要演到咁傳神，相信俄國戲劇大師史坦尼斯拉夫斯基都要向曾江致敬。大姐大更特別一讚4人中年紀最大的胡楓(修哥)，原來最淡定，能適當時候出手化險為夷，成為「救火英雄」，下集會唔會四哥與曾江握手言和，到Joe Junior話忍咗老人家修哥好耐，要再來一場決戰呢？無論這場鬧交真人騷點收科也好，難得大家睇得咁開心，一定成為今年最爆娛樂新聞。

文﹕大姐大