《星戰7》美預售票房逾7.8億破紀錄 古天樂勁讚父子情感人
【明報專訊】《星球大戰：原力覺醒》今日在港正式上映，明日則在美國開畫，雖然香港未有公布預售的票房數字，不過網上預售不少3D版場數都爆滿，美國方面更據綜藝報章The Hollywood Reporter引述業界消息人士指，新片還未上映，預售票房率先衝破一億美元(約7.8億港元)大關，刷新荷李活史上最高紀錄之餘，並預示首周末開畫票房很大機會再創佳績。前晚率先睇首映的星戰迷古天樂大讚《星7》追看性高值得再看，尤其有段感人父子情，追足前6集的游學修亦大讚值90分！
《星球大戰：原力覺醒》今日在港正式上映，預售票房非常理想，明日美國才開畫，據報在逾億美元預售票房中，佔了一半(約3.9億港元)或以上屬於首周末3日的場次，其餘則是本月下旬其他日子，當中又以聖誕假期為主。有傳電影公司要求院商承諾《星戰7》必須放映4至5個星期，保證雙方都有穩定票房收入。
古仔﹕會睇多次
至於香港方面前晚已率先睇《星戰7》首映的一班星戰迷藝人，古天樂完成慈善禮後急不及待入場，游學修與女友蘇麗珊以情侶裝拍拖捧場，蔡瀚億單拖現身，商台DJ Donald則Cosplay到場，最有心思。
他們睇完後有何觀後感呢？星級「星戰」鐵粉古天樂說﹕「好開心，好好睇，比想像中好好多，值得睇！我都會睇多次，因為追看性好高，好多伏線。而且以往故事多黑暗面，今集幾幽默，好多起伏因素，尤其戲裏有段父子情，好感人，一定要睇這一Part，加上今次有個BB8機械人，好得意。」
游學修﹕伏線鋪排吸引
憑電影《哪一天我們會飛》人氣急升的游學修，大讚今集《星戰7》值90分，他說﹕「星戰之前6集我都有睇，所以有期望。今集雖然轉了導演，不過他拍過好多大片，覺得他今次處理得好好，好擅長運用感情、人物出場位，現場好多觀眾都睇到歡呼，而且以前的星戰故事不算好勁，在當時的年代算做得好，今集的伏線鋪排得好吸引，是合共7集之中故事最好的一部，視覺上都有升級。」他稱唯一美中不足是片尾的鏡頭﹕「最後個鏡頭用航拍，好唔星戰，同朋友傾過，覺得非常多餘，睇起來好突兀。」 結伴到場的女友蘇麗珊對影片傾向有好評？游學修說﹕「她好滿意，睇到好興奮，拍晒手，好鍾意機械人。」
游學修指事前與女友蘇麗珊重溫3集《星戰》，皆因女友從未看過。近來是否多了工作？游學修笑言﹕「之前是近乎無工作，所以絕對是多了工作。」
記者﹕梁榮達、鍾一虹
攝影﹕黃梓烜
■更多娛樂猛料 ﹕ol.mingpao.com
大姐大手記：發哥講求角度誓做自拍王 王子怪癖霸廁所狂影
【明報專訊】拍照是每個藝人必要做的事，無論是出席活動被拍、被追蹤記者偷拍或是閒時無聊自拍，部分自戀狂的藝人更是對住鏡狂影幾百張相都不手軟。對... 詳情
