人力廉署舉報陳健波 波哥勸議員勿「拉布成癮」

人力廉署舉報陳健波波哥勸議員勿「拉布成癮」

[2016.01.19] 發表

【明報專訊】立法會財委會正審議港珠澳大橋追加撥款，人民力量等議員就繼續力阻撥款，財委會主席陳健波(波哥)上星期五就被質疑佢所屬嘅保險公司，曾承保港珠澳大橋工程，涉及利益衝突，當日會議爭拗完，最終投票決定波哥繼續主持會議。以為無事啦，點知人民力量陳偉業(大嚿)、陳志全(慢必)等噚日就去廉政公署，舉報陳健波涉嫌向保險公司利益輸送。

噚日約30個人力成員喺廉署外請願，要求署方跟進，陳志全質疑慕尼黑再保險公司承保唔少基建，如工程未如期完成會涉保險賠償，質疑陳健波要力保港珠澳大橋撥款通過，係唔希望保險公司蒙受損失。

波哥話已一早申報

波哥噚日就呼冤，話自己一早依足立法會要求申報，相信廉署會公平公正處理，唔會淪為政治鬥爭工具。根據立法會嘅申報文件，波哥的確喺2012年時申報喺慕尼黑再保險公司做受薪顧問同非受薪董事，但2014年10月時，就已表明自己停止擔任非受薪董事，強調唔係董事，就無參與公司嘅日常運作喇。波哥話佢一年之後先擔任財會主席，絕對無可能有利益衝突。

波哥仲不忘呼籲議員停止拉布，佢話已經就港珠澳大橋追加撥款開咗6個鐘會，但只有兩個鐘用喺提問有關項目嘅問題，佢希望議員要善用時間，而唔係玩弄程序，又呼籲議員唔好「拉布成癮」，做「拉布隱君子」，希望佢哋重新做人咁話。

更多港聞