自動當選9人獲選舉捐贈 陳振英收中銀兩萬 係借房免租

自動當選9人獲選舉捐贈陳振英收中銀兩萬係借房免租

[2016.10.13] 發表

【明報專訊】立法會秘書處公布新一屆議員嘅《個人利益登記冊》，唔少議員都有收到「選舉捐贈」幫補吓選戰期間嘅宣傳費。令人意外嘅係，今屆12名自動當選嘅功能組別議員當中，有9人都收過選舉捐贈或贊助，好似金融界陳振英(圖)嘅申報文件，就顯示佢收咗中銀香港20,734元捐贈。佢噚日同Emily解釋，當時喺中銀借咗間「房仔」畀佢做競選辦公室，嗰2萬幾蚊就係租金。

最新公布嘅議員個人利益登記冊，顯示唔少議員都有收到選舉捐贈或財政贊助，但大部分人都仲埋單計緊數，好多議員嘅申報表都未顯示所收嘅具體金額。本身係中銀香港董事會秘書嘅陳振英就話，因為自己條數簡單啲，較早前已經交晒畀秘書處，仲詳列咗金額細項，又話嗰2萬幾蚊係房租之餘，仲係選舉報名日借咗架車過政總遞表。

劉國勳﹕唔知會自動當選

除咗陳振英之外，地產及建造界石禮謙就收到經民聯捐出2607元、同埋Lau Shun Wah Maggie捐出嘅1500元；工業界(第二)吳永嘉亦申報，收到廠商會贊助兩名員工嘅月薪。至於勞工界嘅陸頌雄、何啟明，同埋區議會(第一)劉國勳，都申報有收到選舉捐贈，但就未有具體金額。何啟明同劉國勳都話，參選時唔會知道自己自動當選，所以都有準備宣傳單張、選舉活動等前期工程，捐款主要來自本身政黨，分別係工聯會同民建聯。

梁美芬收經民聯83萬

另外，經民聯大部分議員都申報晒具體所收捐贈款額，當中以九龍西直選嘅梁美芬收到經民聯最多捐贈，有近83萬元，而功能組別議員就只係收到2607元。

更多港聞