田少批「突然積極」 張宇人：佢靠估

田少批「突然積極」張宇人：佢靠估

[2016.12.01] 發表

【明報專訊】自由黨新主席張宇人(圖)獲委任為行政會議成員，惹來元老級黨友連番批評，榮譽主席田北俊仲不時同佢隔空駁火。田少噚日再次開腔，話張宇人喺今年自由黨改選「突然積極」，懷疑有人事先同張溝通，等佢做咗黨主席就入得行會咁話。張宇人反駁田少言論「靠估」，覺得「佢點估係佢嘅問題」，仲話自己喺新界東開辦事處仲早過田少！

指新東開辦事處早過田少

田北俊噚日喺商台提到，行會成員與黨主席身分有利益衝突，又擔心行會公務繁重，張宇人未必有足夠心力處理黨務。田少又話，今年原定由副主席邵家輝升任主席，但邵指自己係議會新丁，難以身兼兩職，此時張宇人就話自己願意幫忙擔當主席之位，認為過往「好少參與」黨務嘅張宇人似乎係「突然積極」。

張宇人同日喺立法會反駁，話自己喺黨友方剛鼓勵下先參選主席，仲話「佢攞咗大包糖畀我，𧨾我落疊」，而過去20多年佢亦做咗唔少黨務，可能「田生記憶只得過去嗰幾年」。佢又強調喺議員宣誓(即10月12日)後先收到加入行會嘅邀請，當時已經當選黨主席，之前亦唔知情。咁佢有無能力身兼兩職呢？張宇人話，不嬲都話自己「唔係自由黨未來希望，我係頂住檔」，又叫黨友「放眼睇吓我有幾多時間做黨務」，話對自己都有一定要求，如果覺得幫唔到個黨做嘢，都唔會阻住個黨發展，但𠵱家未係適當嘅交棒時間。

更多港聞