「要有慈悲心」 大輝列特首3條件 未有人搵站台

「要有慈悲心」大輝列特首3條件未有人搵站台

[2016.12.06] 發表

【明報專訊】特首選戰漸趨明朗，上屆係「唐營」要員嘅立法會前議員林大輝，已循政協界別自動當選選委，有票在手可以投票選特首，大輝話至今仲未有人搵佢站台，而新民黨主席葉劉淑儀15號宣布參選嘅活動，佢亦未有收到通知。不過作為選委嘅佢噚日就開咗3個特首條件，包括有智慧、有慈悲心同有誠意，佛偈味都幾濃。

話政綱係空頭支票重要係落實

大輝話，特首需要有智慧帶領香港發展，智慧亦要係善意、正面嘅，而唔係心存惡念；至於慈悲心，佢就話特首要令香港人覺得開心，如果社會成日爭拗吵鬧，市民都唔會開心。咁究竟現時潛在參選人有邊個符合上述條件或者較優勝呢？大輝就拒絕透露。至於好多人重視嘅政綱，大輝直言只係空頭支票，最重要係點落實，仲話到時會向參選人直接問呢個問題。

葉太至今未有承認15號會宣布參選特首，但消息早前已漏出，Emily都問過唔少選委究竟有無收到邀請，廠商會會長李秀恒、自由黨主席鍾國斌等都話無收到，而同葉太係行會同事嘅經民聯林健鋒，就已收到邀請喇。同係選委嘅貝鈞奇，就話收到新民黨人嘅信息，但自己好多會開，唔會出席。而飲食界嘅黃傑龍話，雖然無收到邀請，但會主動問吓葉太可唔可以出席，形容作為選委，都想聽吓特首參選人理念，但強調自己未決定支持邊個喎。

更多港聞