返學開會外 每周一日社服令 羅冠聰去圖書館「擔擔抬抬」

返學開會外每周一日社服令羅冠聰去圖書館「擔擔抬抬」

[2016.12.20] 發表

【明報專訊】立法會議員羅冠聰因為2014年闖入政府總部「公民廣場」被檢控，早前被法庭判處社會服務令120小時，阿聰就話，要返學同開會，並需每周抽一日去做社會服務，形容自己「一臉倦容」。不過阿聰都算好彩，唔使去戶外做粗重工作，而係被分配去到一間盲人圖書館「擔擔抬抬」，工作似圖書館管理員，除咗「收書出書」，近期圖書館裝修，佢都幫吓手執頭執尾。

羅冠聰、楊岳橋及朱凱廸噚日搞facebook live直播吹水，總結今年議會工作。楊岳橋就問阿聰社會服務做成點，阿聰就話噚日先開咗一日工，平時又要返學又要開立法會，都幾頻撲。而當阿廸問阿聰做完功課未時，阿聰就拜託各人「喺假期前可唔可以唔好提呢啲嘢呀？」

講番工作，阿廸話做咗兩個月議員，覺得先啱啱熱身，未來要喺財委會審議工程項目，每次開會要審理幾十億元嘅工程，擔子都有啲重。阿聰話議員工作漸入佳境，下個月喺香港仔嘅地區辦事處開張大吉，佢仲應承阿廸，話響應環保唔搞切乳豬活動。

佢哋講到特首梁振英及律政司長袁國強入稟DQ 4名議員事件時有少少激動，楊岳橋就話，「689你都玩完啦，袁國強跟呢個大佬都無運行」，叫袁國強不如放棄提出訴訟喎。

更多港聞