評4特首人選 波哥話葉劉「同我最接近」

評4特首人選波哥話葉劉「同我最接近」

[2017.01.13] 發表

【明報專訊】立法會噚日續會辯論有關下屆特首期望嘅議案，保險界議員陳健波(波哥)趁機喺facebook上載短片，講吓自己點睇4個潛在特首人選。波哥讚兩名司長林鄭月娥同曾俊華，又話已宣布參選嘅新民黨主席葉劉淑儀「同我最接近」。嘩，邊方面近呢？波哥話佢講緊嘅係地理位置咋，事關葉太嘅議員辦公室就喺佢隔籬房，而對方亦係唯一一個經歷直選洗禮嘅人選。

梁君彥提醒長毛勿「拉票」

退休法官胡國興同葉太早前率先宣布角逐下屆特首，財政司長曾俊華及政務司長林鄭月娥亦已先後請辭。波哥噚日點評4人時就話，林太做嘢「親力親為、執行力強、勇於承擔」，財爺就「民望高、熟悉金融政策」，而胡官就「肯聽意見，重視同熟悉法治」。

不過，波哥話無論邊個做下屆特首，都要首先處理房屋問題，包括將公屋比例由現時嘅47%增至60%，第二就要諗辦法令香港人開心啲，佢仲叫網民留言講吓對特首有咩期望。

至於由工聯會郭偉強提出對「下任行政長官期望」嘅無約束力議案，要求下屆特首要維護國家主權、落實「一國兩制」、推動政改同經濟發展，議案經分組點票下被否決。考慮參選嘅社民連梁國雄都有發言，但立法會主席梁君彥就提醒佢，發言內容唔可以畀人覺得佢利用今次場合「拉票」。

更多港聞