戰九西 馮檢基過黨內初選 侯志強欲戰新東 話「上場無父子」

戰九西馮檢基過黨內初選侯志強欲戰新東話「上場無父子」

[2017.06.21] 發表

【明報專訊】青年新政梁頌恆及游蕙禎立法會議席(新界東及九龍西)預料最快明年初補選，唔同黨派都摩拳擦掌開始熱身賽。其中民協近日就九龍西補選舉行黨內初選，唯一參加者、前立法會議員馮檢基，獲有權投票嘅24名黨友中最少三分之二信任票支持，按機制通過黨內初選，有待黨中委確認程序，就有機會「翻生」代表民協出戰補選。

馮:先推動民主派協調

民協是次初選有24人有權投票，包括中委同過去兩年曾參與立法會或區議會選舉嘅黨員；據了解，初選有19人投票、5人無投票，馮檢基獲16張或以上信任票。一直負責協調民主派嘅「民主動力」，今晚將開會討論立法會補選初選機制。

馮檢基就話，希望先推動民主派舉行初選，因今次補選係「單議席、單票制」，故民主派要選出一名代表與建制派對戰，如有多過一人參選，將不利民主派選情。問及佢喺民主派初選嘅勝算，又或如果民主派未能舉行初選，佢自己會唔會照樣出戰補選，馮檢基話「唔喺𠵱家講」。

去年得票麻麻侯:聽天由命

另一邊廂，上水鄉事委員會主席侯志強亦蠢蠢欲動，表態話有意參選新界東，不過究竟係極度認真定係想同建制派講數，就要拭目以待。

侯志強去年立法會選舉出咗嚟選，仲爭啲搞埋組黨，但最後成績麻麻，得6000幾票。侯志強就自嘲，「死一次係死，死兩次都係死」，所以再參選都無包袱，又話自己會「聽天由命」。

現時建制派方面，九龍西暫定派出藝人胡杏兒嘅姐夫、民建聯深水埗區議員鄭泳舜出戰，新界東則派出工聯會鄧家彪。侯志強就話自己都有興趣參選，仲話為原居民爭取權益嘅心，永遠唔會變。佢又豪言「上場無父子」，唔會考慮其他建制派係咪派人出選。

更多港聞