蔡若蓮國慶拉大隊訪京交流
[2017.10.02] 發表
【明報專訊】教育局副局長蔡若蓮嘅長子潘匡仁上月墮樓亡，上星期出殯，蔡若蓮已經回歸工作，同教育業界人士參加香港教育界國慶訪京暨專業交流團。蔡若蓮噚日喺facebook撰文，話由「我們的國家曾經挨打、挨餓、挨罵」，到今日「我們的民族有尊嚴地立足世界」，十分感恩。
感恩國家「有尊嚴地立足世界」
交流團喺9月26至10月1號舉行，Emily聽聞蔡若蓮原本係團長，但由於要處理兒子身後事，所以遲咗一日上去，最後由教育局首席助理秘書長李美歡做團長。行程包括訪問天津中、小學同幼稚園，參訪科技公司、參觀南開大學同清華大學、到人民大會堂聽國家最新發展報告等，噚日國慶日朝早仲去天安門廣場睇升旗儀式。
蔡若蓮噚日回覆Emily時話，透過參觀交流，加深咗對國家教育範疇工作嘅認識，彼此分享教學心得，希望將來多啲與同工交流，「為香港的教育一起努力」。
至於中央政府人員講咗啲乜，Emily聽講，其中一個行程係喺清華大學聽中聯辦法律部長王振民講課。有份參加嘅教育評議會主席何漢權話，王振民指出《基本法》對維繫一國兩制好重要，希望教育工作者多啲認識。王振民又指國家堅持「一國兩制」，唔會改變，對港獨零容忍。
更多港聞
【明報專訊】國慶加上周三中秋節，呢個星期有兩日公眾假期，而多個慶祝中秋同回歸20周年活動同時舉行，包括兩項舞火龍活動、多個中秋節嘉年華及一個...
詳情
相關新聞
