陳帆「後生買車論」有人附和
[2017.10.16] 發表
【明報專訊】運輸及房屋局長陳帆噚日被問及喺私家車數量仍然好多下，政府係咪需要檢討新車牌發出制度時提到買樓，話後生仔買唔到樓但又想有自己空間，所以會買架車，「讓個軀體同個靈魂可以出去遊走一下」。唔少年輕議員都對呢番言論有反應，有人話觀察到的確有年輕人因為覺得買樓係妄想，所以買部車玩吓算；亦有人話局長離地。
工聯會陸頌雄話，局長應該諗吓方法，提供後生仔負擔得起嘅樓，話如果後生仔買到樓，自然會減少買車，咁樣車位不足及塞車問題都可以紓緩喎。
公民黨楊岳橋就批評陳帆言論離地，佢反問「陳局長你知唔知而家啲車位幾錢一個？租金幾多錢？有冇聽過買車容易養車難？」
年輕區議員民建聯顏汶羽及新同盟鍾錦麟都話，據佢哋觀察，確有後生選擇去買車，但話停車場費等養車開支好大，唔係太多人負擔得起。有車一族嘅鍾錦麟就話，買車買樓係個人選擇，不過年輕朋友對汽車有興趣，係佢哋社交圈子一部分。但如果陳帆局長講到要控制私家車增長，就唔應該特別針對年輕人買車，應該研究不同階層嘅人揸車嘅原因同模式。
陸頌雄﹕多咗holiday driver
顏汶羽就話，局長關注年輕人買車，不如用心研究起多啲青年宿舍。佢話後生仔想有自己嘅生活空間，如果收佢哋千幾蚊租金，起碼佢哋有自己空間，又可以幫青年儲錢，日後佢哋就可以自己置業。
最近考到車牌同買車嘅陸頌雄話，十年八年前天水圍屋邨停車場唔難搵車位，但𠵱家多咗好多車，睇到唔少後生仔做holiday driver。佢話後生仔見到樓價不斷升，買樓由理想變妄想同幻想，倒不如將積蓄拎去買車或旅行。佢話政府應諗方法，如將綠置居等定價定低啲，提供置業希望，咁大家自然會拎錢去供樓而唔係供車。
更多港聞
容海恩獻唱 Paul Anka上身 自嘲鵝公喉 網民﹕夠膽 佩服
【明報專訊】新民黨立法會議員容海恩（Eunice）一向鍾意唱歌，即使有網民笑佢聲線太沉「鵝公喉」，佢都唔會介意。佢前晚喺打鼓嶺出席地區活動時... 詳情
【明報專訊】民主黨副主席兼區議員羅健熙好鍾意影相，不時喺社交網站分享攝影作品，佢話最近收到工作邀請，幫旅客做攝影師影相，不過佢覺得從政嘅身分...
詳情
【明報專訊】廠商會今年底舉行會長選舉，會長由110名會董選出，目前正值會董選舉。今次有兩人表明有意競逐會長，分別係副會長吳宏斌同徐炳光，選情...
詳情
【明報專訊】英國《金融時報》公布全球EMBA（行政人員工商管理碩士）課程排名，首兩名都係本港大學有份主辦嘅課程，第一係科技大學，香港大學緊隨...
詳情
相關新聞
