憶7年前與謝安琪同患抑鬱病 張繼聰食藥頂硬上撐老婆攞獎

憶7年前與謝安琪同患抑鬱病張繼聰食藥頂硬上撐老婆攞獎

[2017.11.05] 發表

【明報專訊】張繼聰當年未紅時，他身邊是樂壇當紅的太太謝安琪，當年外界視這一對為「女尊男卑」，張繼聰被網民封「謝繼聰」、「廢柴老公」。近年張繼聰在電影、電視皆受歡迎，是廣告紅人，成績獲認同。謝安琪就在享受當全職媽媽的樂趣，計劃休息至明年才復出。撐起成頭家的張繼聰前晚突然在facebook有感而發，撰長文自爆當年與謝安琪同患上嚴重抑鬱病，要頂硬上出席商台頒獎禮時的心情。

「好口乾好頭暈好攰」

頒獎禮片段是2010年舉行的叱咤頒獎禮，謝安琪獲女歌手銀獎，她上台領獎，張繼聰在台下拍掌。他寫道﹕ 「7年前嘅呢一日，當時嘅我可以話係考緊宇宙畀我嘅試……當時我嘅抑鬱病非常嚴重，非常想又非常怕去呢個Party 。想去，係因太太當時成績非常出色；怕去，係因為我當時嘅成績非常無乜成績。片中所見嘅我，其實當時食行藥，所以好口乾、好頭暈、好攰，個cam又起勢隊住隊住……好想抱住佢(太太)，再同時好驚好怕，好擔心食白果嘅我唔知又會畀人點嘲笑……同時台上嘅太太，成晚雖然得到好多個獎，其實當時嘅佢抑鬱病都好猛烈，承受好大嘅壓力，佢都係考緊宇宙畀佢嘅試……」

「嗰日唔係路障係加油站」

「快樂，其實係因，唔係果……我想講嘅係，每一個經歷其實無乜意義，意義係由自己去界定。但係一定比你想像中美好同重要，就算當時係幾惡啃都好，好好行自己嘅路就掂。就好似我家吓睇番段片，發現原來嗰日唔係路障，而係加油站，令我選擇之後嘅路，決心尋找快樂同自在。亦係嗰日，令我更有勇氣去更多嘅頒獎禮，食更多嘅白果。所以你話，人生幾美好，根本就無衰嘢」。片段中森美宣布謝安琪獲女歌手銀獎，鏡頭對準台下的張繼聰，他保持笑容但難掩緊張表情。原來他當時吃了情緒病藥，在頭暈、又攰又口乾狀態。謝安琪在台上感言好激動，阿聰則忍淚至現場燈光轉暗才偷偷拭淚。

娛樂組