【明報專訊】香港電台《視點31》噚日邀請咗公民黨立法會議員陳淑莊(Tanya)及職業高爾夫球協會名譽會長陳百祥(阿叻)，辯論粉嶺高爾夫球場應否被收回建屋，火花四起。阿叻話支持唔好拆個高球場，「我只係覺得點解政府可以咁無聊，為咗起屋而拆球場……土地供應(小組)將呢個(高球場)列入(18個)選項係傻嘅」。 阿叻聲稱自己只係一個普通人，一年只打一兩次高爾夫球，亦非高爾夫球協會會員，「高爾夫球場唔關我事」，但覺得政府無聊，所以發聲反對拆高球場。佢又話，土地不足已經係社會多年嘅問題，「由我出世到𠵱家都係問題，我𠵱家25歲零萬幾日……我出世時都唔夠地，我都差啲想輪候公屋」。 阿叻又批評政府太弱勢，咩都要諮詢，「梗係唔使諮詢啦」，認為一個強勢政府只係用行政決定，拋出兩三個方案，就可以起屋。佢建議政府可以填海解決房屋問題，或者喺葵涌貨櫃碼頭起屋。 Tanya指出，填海代價大，成本需要每公頃2億元；而本港嘅貨櫃碼頭仍然好有競爭力。Tanya亦強調，建議用高球場建屋並非仇富。阿叻就話：「高爾夫唔係有錢人打。」但Tanya反駁，話之前有記者以市民身分入場打，個人花費至少3000幾蚊，阿叻反問：「你有無入過去，800蚊一次咋。」
|
| |
| |
;){kind=small}
