【明報專訊】劉小麗早前被裁定提名無效，無法入閘參加11月嘅九龍西立法會補選，絕大部分民主派支持工黨副主席李卓人做「Plan B」參選。一直支持Plan B由初選產生嘅民協亦「歸隊」，周一晚開完擴大中委會之後，發聲明決定支持李卓人。 民協本支持初選 周一晚「歸隊」 已退出民協嘅馮檢基早前去信民協爭取支持，民協有決定後除咗發聲明交代決定外，主席施德來亦特別回信畀基哥解釋決定，話衷心感謝基哥對民協嘅付出，雖然同意初選係處理Plan B最佳方法，但民主派冇分裂本錢，要集中票源先可以有機會戰勝建制派。 兩人多年嘅黨友關係，令施德來呢封回信非常親切，上款係單字一個「基」，下款則係「來」。 稱民協絕少改立場 或受巨大壓力 對於民協決定支持李卓人，基哥噚日深夜喺facebook發帖，話對民協「忽然支持欽點Plan B」嘅改變表示遺憾；9個鐘之後，佢又再出帖話「理解民協可能受到前所未有的巨大壓力」，因為民協絕少改變已公開嘅立場。 已報名參選嘅仲包括陳凱欣、伍廸希同曾麗文。
|
| |
| |
