渠務署長榮休 難忘為歷史建築刨書
[2019.02.25] 發表
【明報專訊】渠務署長唐嘉鴻榮休，上周五同傳媒茶敘，分享37年公務員生涯。署長話咁多年參與咁多工程，最深刻係施工期20年嘅淨化海港計劃，呢個歷來最大型環保工程，令維港水質大幅改善。署長係工程師，但都參與過同工程關係唔大嘅工作，就係2009年加入發展局負責首期歷史建築活化計劃，佢話為咗呢個項目睇咗唔少書，惡補文物保育知識，並抱戰戰兢兢心態去做，最重要係確保公帑運用得當，而當時獲批准嘅項目如雷生春、饒宗頤文化館、大澳警署酒店、美荷樓等，至今仍然運作，佢仲話退休後想搵個周末同太太住吓大澳警署酒店。
署長話退休後好多嘢想做，例如旅行同行山，但唔會入商界。佢又寄語接棒嘅署長秉承渠務署文化，開放接受新事物，因為試過至知新科技係咪可行。
更多港聞
【明報專訊】一年一度嘅香港花卉展覽吸引唔少攝影發燒友同愛花者入場，今年展覽喺3月15至24日舉行，為期10日，朝9晚9開放。今年花展主題為「...
詳情
相關新聞
