【明報專訊】港大民意研究計劃新公布嘅調查，問到香港人對唔同地方嘅人同政府嘅觀感。調查話，港人最有好感嘅原來係台灣人，有62％受訪者話對台灣人民抱有好感，反感嘅只得3％。能夠拍得住台灣人得到港人好感嘅係新加坡人，好感同反感分別佔61％同2％。調查最特別嘅，係港人對港人自己嘅好感度大跌，好感度係41％，比舊年11月大跌8個百分點，民研總監鍾庭耀話，呢個結果反映香港社會分化咗。 對台灣人好感最高 逾六成 港大民研喺5月29日到本月2日訪問1038人，調查結果中，港人最反感嘅係大陸人，有21％受訪者話對大陸人民反感，不過亦有28％表示好感。 政府方面，港人對特區政府好感係27％，反感有36％。對於中央政府，30％表示好感，31％表示反感，都係反感多過好感。耐人尋味嘅係，喺兩岸四地最得港人青睞嘅唔係台灣政府而係澳門政府，好感度有41％，反感有13％，唔知同派錢有冇關係呢？ 新加坡政府最得港人歡心 計埋其他地方，新加坡政府最得港人歡心，55％好感，7％反感。其次係加拿大政府，48％好感，只有1％反感。
|
| |
| |
;){kind=small}
;)
