【明報專訊】北京上星期舉行抗日勝利70周年閱兵，香港有唔少人獲邀上去睇閱兵，事後唔少人都話震撼，而內地官媒中新網搵咗好多參加者做訪問，講吓閱兵感受，好似全國政協常委胡定旭(肥胡)咁，佢話今次已經係第三次睇閱兵，1999年、2009年嘅國慶閱兵佢都有去，每次都令佢感到好驕傲喎。 佢話，今日中國能夠走到呢一步，真係唔容易，佢1974年去英國讀書同工作時，就切身感受到英國人睇唔起中國人，當時有間酒店，印度人可以入去住，但香港人就唔得，後來酒店就畀香港人買咗。佢又話中國無論有幾強大，但中國人都會保持謙虛。 除咗閱兵，其實中新網8月份都訪問過胡定旭，講吓氣候變化、環保等問題，佢覺得企業要做好社會責任，好似佢就諗吓工廠點樣可以減低碳排放，以及點樣推動環保公益事業。內地官媒短時間內兩次訪問肥胡，唔知有乜玄機？
|
| |
| |
;)
