【明報專訊】今年係中華人民共和國成立66周年，國慶籌委會將喺紅館舉辦兩場活動，包括10月1日嘅傳統文藝晚會及10月2日嘅「國慶青年音樂會」。擔任晚會監製嘅高志森透露，當晚駐港部隊文工團將首次表演「槍操」，仲以「小閱兵」形容，話會十分震撼。 高志森梗係要賣花讚花香，話等大家睇「槍操」，感受一下駐軍幾咁好，「港人不用給一分軍費，但受到最精良的軍隊保護」。愛國歌手張明敏就會同阿仔張頌華同台演出獻唱《父子》，代表中國與香港嘅關係。 至於壓軸節目，係由漫畫大師馬榮成與香港舞蹈團合作嘅「盛世風雲」。高志森話，今次呈現嘅係10分鐘精華版，到時舞台更會轉變為水池。 籌委會秘書長、中華總商會永遠名譽會長蔡冠深話，屆時全國政協副主席董建華、特首梁振英，以及3司12局官員都出席。不過，第二日特別為年輕人炮製嘅音樂會，佢就話「一個官員都唔會有」，大家可以開開心心享受音樂。 民政事務局將於聽日(9月25日)上晝9點，喺各民政事務局諮詢中心派發4000張10月1日晚會免費入場券，每人兩張，先到先得，當晚亦有電視台直播或轉播。
|
| |
| |
;)
