【明報專訊】立法會噚日舉行新春酒會，特首梁振英(CY)同多名司局長齊齊出席，稀客社民連梁國雄(長毛)都有參加，但原來出席嘅目的，係帶同「一帶一路督導吹水獎」，同「1966年九龍騷動調查委員會報告書」，諷刺CY嘅一帶一路工作，同埋諷刺將旺角衝突事件定性為「暴動」。CY拒絕接收個「獎盃」，長毛最後亦被工作人員帶走。立法會主席曾鈺成致辭時，就用幽默化解緊張氣氛，話「元宵佳節除咗花燈、燈謎，仲有『馬騮戲』，算應節」。 今年立法會慶新春嘅安排有別往年，昔日係以午宴形式舉行，仲會有議員同官員一齊玩遊戲嘅環節，但曾鈺成話，由於午宴時間夾咗好耐都未夾到，所以今年改用酒會形式。佢致辭時仲話，今屆立法會只餘下約5個月任期，希望議員同官員互相「容忍」，一齊處理好各項問題，做對社會同市民有利嘅事。 李國章心情好 CY陳鑑林密斟 席上身兼港大校委會主席嘅行政會議成員李國章心情非常好，仲主動走去同長毛碰杯。CY同民建聯陳鑑林就密密斟。陳鑑林就強調無講到關於財委會高鐵撥款，同版權條例嘅事，CY只係同佢分享去中學推廣創新科技嘅事。
|
| |
| |
;){kind=small}
;)
