鬧梁天琦唔幫手 鄭松泰戥「教主」辛苦
[2016.08.30] 發表
【明報專訊】出選九龍西的黃毓民日前高調開腔怒斥本土民主前線梁天琦無政治倫理，引起「熱普城」(熱血公民、普羅政治學苑及城邦派)同本民前兩派支持者喺網上互相攻擊。出戰新界西嘅熱血公民鄭松泰就接力指斥「同路人」，批評為青年新政站台嘅梁天琦同港大學生會前會長馮敬恩，搞到教主(黃毓民)咁辛苦。
鄭松泰前晚喺網台節目開腔話自己都好嬲，仲哽咽咁話﹕「今屆係毓民，肯定係最後一屆啦，你哋唔X明咩？」鄭仲問梁天琦同馮敬恩，「你有少少分析能力，就知道要推動呢個運動，無黃毓民係唔成事㗎。咁點解你要令到教主咁辛苦呢？你哋係咪戇X㗎？」鄭強調，「無毓民就無今日嘅全民制憲運動……無黃毓民，香港就一國一制咗好耐啦」。
青年新政同「熱普城」喺3區撞區，分別係九龍西、新界西同新界東，整個選舉過程原本相安無事、「兄弟爬山各自努力」，但近日黃毓民選情嚴峻，民意支持度同青政游蕙禎叮噹馬頭，力爭入局。黃毓民就突然怒斥梁天琦，指佢無幫港島熱血公民鄭錦滿拉票，但走去九西幫游蕙禎助選，斥梁無政治倫理。
出選新西嘅社民連黃浩銘就喺facebook食花生，仲回應鄭松泰話，「如果熱普城五個候選人入唔到立法會，香港會死？你死我都未死呀！」熱血公民同社民連一向唔啱傾，對於對手批評社民連抗爭無力，黃浩銘就話，「東北拉布，示威者抗爭，黃毓民完咗會即刻去講波呀！你有咩資格鬧社民連呀鄭松泰？笑死人啦。」
立法會選舉候選名單見附圖。
更多港聞
醫界陳沛然投訴黃以謙廣告誤導 黃否認﹕唔會修改
【明報專訊】立法會兩名醫學界候選人陳沛然同黃以謙近日多次對戰，陳沛然噚日仲走去選管會投訴，話黃以謙嘅選舉廣告以列表方式扭曲佢嘅觀點，認為咁樣... 詳情
【明報專訊】「家長權益大聯盟」公布立法會選舉候選人對「維護家庭婚姻價值」問卷嘅回應，明確表示會維護家庭婚姻價值嘅候選人大部分都係建制派同獨立...
詳情
相關新聞
