《特區20周年圖冊》 不提佔中七一遊行
[2017.07.01] 發表
【明報專訊】每年出版嘅《香港年報》，記錄咗香港各方面嘅生活面貌。今年係香港回歸20周年，政府特別製作咗《香港特區二十周年紀念圖冊》，畀市民睇番香港過去20年嘅發展。不過Emily噚日攞住本實體書，揭完又揭，總係覺得差咁啲嘢。
圖冊有160頁，包括「一國兩制」、「港人治港」、「經濟發展」等20個章節，相片經過精挑細選，例如「一國兩制」章節嘅落馬洲邊境管制站，喺天朗氣清嘅日子拍攝，由香港遠眺深圳，令人有背靠祖國嘅感覺；其他章節都挑選有代表性嘅相，但一啲重大事件例如佔中、一年一度嘅七一遊行都隻字不提，相都無張，即使2003年令299人死亡嘅SARS疫症，原來隱藏咗喺「食物安全和公共衛生」章節，揀咗張小學生齊齊除口罩相；香港一向被譽為示威之都，年年7月1日都有萬計市民遊行，但整本圖冊只有一張由工聯會發起嘅遊行相。
圖冊前言就由啱啱卸任嘅前行政長官梁振英撰寫，話20年來香港按照《基本法》落實港人治港、高度自治，唔單止維持咗穩定繁榮，仲充分顯示一國和兩制嘅雙重優勢。
更多港聞
相關新聞
