【明報專訊】一直表示未決定會否出戰11月立法會九龍西補選嘅前食衛局政治助理陳凱欣，近日以香港受超強颱風「山竹」吹襲後市民齊齊搬塌樹、自己受打動為由，轉稱積極考慮參選。已宣布參選嘅民主派劉小麗，噚日形容陳凱欣說法「可笑」、「咁都講得出」；咁劉小麗受何事感召參選呢？佢話係源自社會不公義同埋無普選，形容香港近年面對嘅政治風暴，比山竹更大。 捐出半數立會薪津 劉小麗前年競選立法會議員時，曾承諾當選後每月會捐出一半月薪，但有網民一直質疑佢究竟有無兌現承諾。劉小麗噚日舉行傳媒茶敘，向記者展示捐款單據，捐款金額加埋超過43萬，正正係佢被取消議員資格(DQ)前、擔任9個月議員所獲薪金嘅一半，受助組織包括「支援院舍行動」、「香港廚師聯盟」同「香港婦女勞工協會」等。 「守護公義基金」早前幫劉小麗籌錢打宣誓案，佢後來放棄上訴；劉小麗噚日強調，捐款由基金處理，佢選擇唔上訴後，剩低嘅捐款會轉為支援其他面對官司嘅受助人。 至於陳凱欣噚日就同10幾個市民去咗港鐵總部請願，要求港鐵盡快交代沙中線土瓜灣站沉降詳情，確保樓宇安全及賠償業戶損失。陳凱欣8月出席公開活動時，土瓜灣站早被發現工程問題，佢當時唔肯評論支唔支持引用立法會特權法，調查沙中線問題，話只希望關注健康問題。有網民噚日就質疑陳凱欣：「特權法唔用，走去示威抽水？」；亦有網民表示︰「支持你凱欣做實事。」
|
| |
| |
;){kind=small}
;)
