【明報專訊】一隻來自泰國嘅狗，懷疑「誤上貨船」嚟到香港，畀漁護署扣留唔夠兩日，就被「人道方式處理」。呢件事唔止香港動物團體關心，泰國傳媒都有報道。 頸上有頸圈 前晚被捉走 民主黨立法會議員鄺俊宇辦事處接到有關消息，話隻狗喺3月6日坐上咗由泰國南部「林查班」(Laem Chabang)開出嘅貨船，經過6日，前日(12日)嚟到香港，貨櫃碼頭員工見到佢有戴頸圈，相信佢喺泰國有主人養。當船上伙長向貨櫃碼頭嘅中介人提到船上有狗，對方就報畀漁護署，署方人員前晚捉走咗佢。貨櫃碼頭員工將隻狗嘅相片上載到互聯網，希望幫佢搵番當地主人；而鄺俊宇辦事處職員話，泰國當地有動物團體同有心人希望將佢送返家鄉，鄺亦已經去信漁護署，希望署方暫為託管，唔好將佢人道毁滅。 漁署話無發現晶片 播病風險高 不過，漁護署回覆Emily話，前晚由船公司接收隻狗之後，經獸醫詳細檢查，冇發現佢身上有晶片。署方基於隻狗冇健康證明文件或醫療紀錄，亦懷疑佢來自有狂犬病爆發嘅地區，形容傳播疾病風險屬於極高，聲稱考慮公眾衛生安全同動物福利等因素後，獸醫已經以人道方式處理咗隻狗。 鄺俊宇知道後狠批漁護署，佢話署方接收咗身上冇微型晶片嘅狗後，一般都會託管4日，睇吓有冇人認領，今次咁快「處決」咗隻狗，批評漁護署唔尊重動物生存權利，「製造一個荒謬嘅國際笑話」。鄺俊宇即日發起網上聯署(https://bit.ly/2HrPOhc)，「促香港漁護署交代『處決』誤闖來港的泰國狗狗事件」。
|
| |
| |
;){kind=small}
;)
