【Emily】退休公僕參戰 張建宗感謝
[2020.03.09] 發表
【明報專訊】政務司長張建宗噚日喺網誌話，唔少現職或已退休公務員響應呼籲，自願參與政府抗疫工作。佢話上星期到訪政府資訊科技總監辦公室(資科辦)家居檢疫控制中心，為工作人員打氣，資科辦起用咗超過200名義工，包括各部門在職同退休嘅公務員，佢哋幫手每日聯絡接受檢疫者，確定佢哋留喺指定處所。
佢又提到，紀律部隊義工隊早前將喺粉嶺暉明邨嘅家俬電器搬去火炭駿洋邨，又幫手裝嵌家俬牀架。警隊亦設立一支200人嘅抗疫專隊，當中130人係退休警，佢哋幫手做電話家訪，核實家居隔離者位置，又為喺內地入境而冇智能電話嘅人戴電子手環。
張建宗感謝所有參與戰「疫」嘅機構同義工，形容佢哋係無名英雄，不求回報同掌聲，值得敬佩。
更多港聞
相關新聞
