【Emily】同邱騰華開視像會 網民讚星部長貼地
[2020.10.17] 發表
【明報專訊】商務及經濟發展局前日公布同新加坡達成「航空旅遊氣泡」原則協議，港人喺滿足相關防疫條件後，就可以免檢疫去新加坡。新加坡交通部長王乙康前日喺facebook上載佢同商經局長邱騰華開視像會議嘅相，有網民留意到王乙康用辦公室常見嘅一疊疊A4紙墊高電腦(圖)，方便開會時遷就電腦鏡頭嘅角度，有網民讚佢咁做夠晒「貼地」。
用兩疊A4紙墊高電腦就啱位
新加坡交通部長王乙康上載開會相後，佢辦公室嘅A4紙意外成為網民焦點，事關有眼利嘅網民留意到佢開視像會議時，用咗兩疊A4紙墊高部手提電腦，方便佢望住熒幕。有網民話佢唔嘥錢買電腦支架，憑呢點睇得出佢係「貼地」部長。有網民又講笑問王乙康，萬一辦公室無晒A4紙，佢又會點樣發揮創意、用咩嘢墊高電腦呢？
王乙康喺帖文提到，開會時邱騰華好快就留意到自己背後嘅碼頭景色，邱騰華亦都即刻調整電腦鏡頭角度，等佢可以隔空欣賞香港維多利亞港嘅風景。邱騰華仲藉住呢點，同王乙康講「香港同新加坡有好多方面都相似」。
更多港聞
相關新聞
